ಒಂದು ಪುಟ್ಟ ಅನುಭವ

 ವೇದಸುಧೆಯ ಅಭಿಮಾನಿಗಳಲ್ಲಿ ನನ್ನ ಒಂದು ಪುಟ್ಟ ಅನುಭವವನ್ನು ಹಂಚಿಕೊಳ್ಳಬೇಕೆನಿಸುತ್ತಿದೆ. ವೇದಾಧ್ಯಾಯೀ ಸುಧಾಕರಶರ್ಮರ ಪರಿಚಯವು ನನಗೆ ಕಳೆದ ಮೂರು ವರ್ಷಗಳಿಂದೀಚೆಗೆ, ಅಷ್ಟೆ. ಅವರ ಒಡನಾಟ, ಮಾತುಕತೆ , ವೇದಮಂತ್ರಗಳಿಗೆ ಮನ ಮುಟ್ಟುವಂತೆ ಕೊಡುತ್ತಿದ್ದ ವಿವರಣೆ, ಎಲ್ಲಕ್ಕಿಂತ ಹೆಚ್ಚಾಗಿ "ವೇದ ಎಲ್ಲರಿಗಾಗಿ" ಎಂಬ ಅವರ ಸ್ಪಷ್ಟ ನಿಲುವು, ನನ್ನನ್ನು ಹೆಚ್ಚು ಹೆಚ್ಚು ಅವರ ಸಂಪರ್ಕಕ್ಕೆ ಬರುವಂತೆ ಮಾಡಿತು. ಆದರೆ ತಲೆ ತಲಾಂತರಗಳಿಂದ ನಡೆದುಕೊಂಡು ಬಂದಿರುವ ಆಚರಣೆಗಳ ಬಗ್ಗೆ ಅವರ ನಿಲುವು ನನಗೆ ಬಹಳ ಅಸಮಾಧಾನಕ್ಕೆ ಕಾರಣ ವಾಗುತ್ತಿತ್ತು. ನಮ್ಮ ಋಷಿಮುನಿಗಳು ಹಾಕಿಕೊಟ್ಟ ಮಾರ್ಗದಲ್ಲಿ ತಾನೇ ನಾವು ನಡೆಯುತ್ತಿರುವುದು, ಆದರೆ ಹಲವು ಆಚರಣೆಗಳನ್ನು ಶರ್ಮರು ಒಪ್ಪುವುದಿಲ್ಲವಲ್ಲ! ದೇವರ ಪೂಜೆಯ ವಿಚಾರದಲ್ಲಿಯೂ ನಮ್ಮ ನಂಬಿಕೆ ಯನ್ನು ಕೆಡಸಿ ಬಿಡುವರಲ್ಲಾ! ಹೀಗೆ ಆಲೋಚಿಸುತ್ತಾ ಅವರು ಕಂಡಾಗಲೆಲ್ಲಾ ವಿಪರೀತ ಚರ್ಚೆ ಮಾಡಲಾರಂಭಿಸಿದೆ. ಎಲ್ಲಕ್ಕೂ ಅವರ ಬಳಿ ನನ್ನ ಸಂದೇಹಗಳಿಗೆ ಸಮಾಧಾನಕೊಡುವ ಉತ್ತರ ವಿದ್ದರೂ  ಈ ವರಗೆ ನಾನು ಆಚರಿಸಿಕೊಂಡು ಬಂದಿದ್ದ ಹಲವಾರು ಆಚರಣೆಗಳನ್ನು ಸಮರ್ಥಿಸಿ ಅವರೊಡನೆ ಜಗಳದ ರೀತಿಯಲ್ಲೇ ಮೊ೦ಡುವಾದ ಮಾಡುತ್ತಿದ್ದೆ.ಆದರೆ ಅವರಾದರೋ ಸತ್ಯವನ್ನು ಬಿಟ್ಟು ಒಂದಿಂಚೂ ಆಚೀಚೆ ಕದಲದಾಗ ಅವರ ಮಾತಿನಲ್ಲಿ ನಂಬಿಕೆ ಬರುತ್ತಾ ಹೋಯ್ತು. ಆದರೆ ಒಂದು ಸಿಟ್ಟು ಕಾಡುತ್ತಿತ್ತು. ನಾನು ದೇವರ ಪೂಜೆ ಮಾಡುವುದರ ಬಗ್ಗೆಯೂ ನನ್ನ ನಂಬಿಕೆ ಸಡಿಲಿಸಿಬಿಟ್ಟರಲ್ಲಾ! ಎಂದು ಅವರೊಡನೆ ಮತ್ತೆ ಮತ್ತೆ ಕಾದಾಡಿದ್ದಾಯ್ತು.  ದೇವರ ಪೂಜೆಯಲ್ಲಿದ್ದ ನನ್ನ ನಂಬಿಕೆಯನ್ನೂ ನೀವು ಕೆಡಸಿ ಬಿಟ್ಟಿರಿ, ನನಗೆ ಪರ್ಯಾಯ ಮಾರ್ಗ ತೋರಿಸಲೂ ಇಲ್ಲವೆಂದು ಸಿಟ್ಟಾದೆ. ಆದರೆ ಶರ್ಮರು ಒಂದು ರಾತ್ರಿ ನಮ್ಮ ಮನೆಯಲ್ಲಿ ಮಲಗ ಬೇಕಾಯ್ತು. ಬೆಳಿಗ್ಗೆ ನಾನು ಆರು ಗಂಟೆಗೆ ಎದ್ದರೆ ಶರ್ಮರು ಆಗಲೇ ಸ್ನಾನ ಮುಗಿಸಿ ಸಂಧ್ಯೋಪಾಸನೆಯಲ್ಲಿ ನಿರತರಾಗಿ ಕಣ್ಮುಚ್ಚಿ ಕುಳಿತಿದ್ದಾರೆ. ಅಂದು ಅವರೆದುರು ನಾನು ಅರ್ಧಗಂಟೆ ಕುಳಿತೆ. ಅವರು ನನ್ನನ್ನುಗಮನಿಸಿರಲಿಲ್ಲ.ಅಂದು ನನಗೆ ಖಾತರಿಯಾಯ್ತು. ಶರ್ಮರು ನನಗೆ  ಒಂದು ಪರ್ಯಾಯ ಮಾರ್ಗವನ್ನು ಕೊಡುತ್ತಾರೆಂಬ ನಂಬಿಕೆ ಬಂತು.ಕಳೆದ ಎರಡುವಾರಗಳ ಹಿಂದೆ ಮತ್ತೊಂದು ಅವಕಾಶವು ದೊರೆಯಿತು. ಹಾಸನಜಿಲ್ಲೆಯ ದೊಡ್ದಮಗ್ಗೆ ಎಂಬ ಹಳ್ಳಿಯಲ್ಲಿ ನಡೆದ ವೇದೋಕ್ತ ಜೀವನ ಪಥ ಕಾರ್ಯಗಾರ. ಅದರಲ್ಲಿ ನಡೆದ ಅಗ್ನಿಹೋತ್ರ. ಅದರಹಿಂದಿನ ರಾತ್ರಿ ಮಿತ್ರರೊಬ್ಬರಿಗೆ ಅನಾರೊಗ್ಯದ ಪರಿಣಾಮವಾಗಿ ಇಡೀರಾತ್ರಿ ನಿದ್ರೆ ಇಲ್ಲದೆ ನಾನೂ ಕೂಡ ಬಳಲಿದ್ದೆ. ವಿಪರೀತವಾದ ತಲೆನೋವಿತ್ತು. ಅಂದು ಅಗ್ನಿಹೋತ್ರಕ್ಕೆ ನನ್ನನ್ನೂ ಕುಳಿತುಕೊಳ್ಳಲು ಶರ್ಮರು ಹೇಳಿದರು. ಅಗ್ನಿಹೋತ್ರ ಮುಗಿಯುವುದರೊಳಗೆ ಪ್ರತಿಶತ ೯೦ ಭಾಗ ತಲೆನೋವು ಮಾಯವಾಗಿತ್ತು. ಮನಸ್ಸೂ ಕೂಡ ಮುದಗೊಂಡಿತ್ತು. ಅಗ್ನಿಹೋತ್ರದ ಸರಳ ಆಚರಣೆ ಬಗ್ಗೆ  ಮತ್ತೊಮ್ಮೆ ಬರೆಯುವೆ. ಆಗ ಅದರ ವೀಡಿಯೋ ನಿಮಗಾಗಿ.