ಅನ್ಯಾಯದ ವಿರುದ್ಧ ಧ್ವನಿ ಎತ್ತೋಣ

ಯತ್ರ ಬ್ರಹ್ಮ ಚ ಕ್ಷತ್ರಂ ಚ ಸಮ್ಯಂಚೌ ಚರತಃ ಸಹ |
ತಲ್ಲೋಕಂ ಪುಣ್ಯಂ ಪ್ರಜ್ಞೇಷಂ ಯತ್ರ ದೇವಾಃ ಸಹಾಗ್ನಿನಾ || (ಯಜು.೨೦.೨೫.)
     ಎಲ್ಲಿ ಬ್ರಾಹ್ಮೀಶಕ್ತಿ ಮತ್ತು ಕ್ಷಾತ್ರಶಕ್ತಿಯು ಒಂದಕ್ಕೊಂದು ಆಶ್ರಯ ನೀಡುತ್ತಾ ಒಟ್ಟಿಗೆ ಪ್ರವೃತ್ತವಾಗುತ್ತವೋ, ಎಲ್ಲಿ ಉದಾರಾಶಯರೂ, ಸತ್ಯಮಯರೂ, ಪವಿತ್ರಚಾರಿತ್ರರೂ ಆದ ವಿದ್ವಜ್ಜನರು, ರಾಷ್ಟ್ರನಾಯಕನೊಂದಿಗೆ ಸಹಕರಿಸಿ ನಡೆಯುತ್ತಾರೋ, ಆ ಲೋಕವನ್ನೇ ಪುಣ್ಯಶಾಲಿ ಎಂದು ತಿಳಿಯುತ್ತೇನೆ. 
     ಸಮಾಜದಲ್ಲಿ ಯಾವೊಂದು ರೀತಿಯ ವಿಭಾಗವೂ ಮೇಲಲ್ಲ, ಕೀಳೂ ಅಲ್ಲ. ವಿದ್ವಜ್ಜನರು, ವ್ಯಾಪಾರಿಗಳು, ಶ್ರಮಿಕರು, ಯೋಧರು ಇವರೆಲ್ಲರೂ ಪರಸ್ಪರ ಅವಲಂಬಿತರು. ಇದು ನನ್ನ ಕೆಲಸವಲ್ಲ, ನನ್ನ ಕೆಲಸ ನಾನು ಮಾಡುತ್ತೇನೆ, ಅವರ ಕೆಲಸ ಅವರು ಮಾಡಲಿ; ನನ್ನ ತಂಟೆಗೆ ಅವರು ಬರುವುದು ಬೇಡ, ಅವರ ತಂಟೆಗೆ ನಾನೂ ಹೋಗುವುದಿಲ್ಲವೆಂದರೆ ಅದು ಸಮಾಜಕ್ಕೆ ಪೂರಕವಾದ ನಡೆಯಾಗುವುದಿಲ್ಲ. ಸಂದರ್ಭಗಳಲ್ಲಿ ಒಬ್ಬರಿಗೊಬ್ಬರು ಪೂರಕವಾಗಿ ಸಹಕರಿಸುತ್ತಾ ನಡೆದರೆ ಸಮಾಜವೂ, ದೇಶವೂ ಅಭಿವೃದ್ಧಿಯತ್ತ ಸಾಗುತ್ತದೆ. ಸರಿಯಾದ ಸಮಯದಲ್ಲಿ ಸರಿಯಾದ ಮಾರ್ಗದರ್ಶನವನ್ನು ಆಳುವವರಿಗೆ ವಿದ್ವಜ್ಜನರು ನೀಡದಿದ್ದರೆ, ಅಥವ ಆಳುವವರು ದುಷ್ಟಕೂಟದ ಸಂಚಿಗೆ ಬಲಿಯಾಗಿ ಸಮಾಜಹಿತಕ್ಕೆ ವಿರೋಧವಾಗಿ, ಅನ್ಯಾಯಿಗಳಾಗಿ, ಪಕ್ಷಪಾತಿಗಳಾಗಿ ವರ್ತಿಸಿದರೆ ಅವರನ್ನು ಎಚ್ಚರಿಸುವ ಕೆಲಸವನ್ನು ವಿದ್ವಜ್ಜನರು ಮತ್ತು ಭುಜಬಲಿಗಳು ಒಟ್ಟಾಗಿ ಮಾಡಬೇಕಾಗುತ್ತದೆ. ಇದಕ್ಕಾಗಿ ಜನರನ್ನು ಯೋಗ್ಯ ರೀತಿಯಲ್ಲಿ ಪ್ರೋತ್ಸಾಹಿಸುವ ಕೆಲಸ ವಿದ್ವಜ್ಜನರದ್ದೇ ಆಗಿದೆ. ಈ ಮಾಡಬೇಕಾದ ಕೆಲಸವನ್ನು ಮಾಡದಿದ್ದರೆ ಅದರ ಫಲವನ್ನು ಅನುಭವಿಸುವವರೂ ಅವರೇ ಆಗುತ್ತಾರೆ.
     ಬ್ರಹ್ಮತೇಜ ಮತ್ತು ಕ್ಷಾತ್ರ ತೇಜಗಳ ಸಮ್ಮಿಲನವಾದರೆ ಎಂತಹ ಚಮತ್ಕಾರವಾಗುತ್ತದೆ ಎಂಬುದಕ್ಕೆ ಚಂದ್ರಗುಪ್ತನನ್ನು ಪ್ರೇರಿಸಿದ ಚಾಣಕ್ಯ, ವಿಜಯನಗರ ಸಾಮ್ರಾಜ್ಯ ಸ್ಥಾಪನೆಗೆ ಕಾರಣರಾದ ವಿದ್ಯಾರಣ್ಯರು ಉದಾಹರಣೆಗಳಾಗಿದ್ದಾರೆ. ವೈದಿಕ ಭಜನೆಯ ಈ ಸಾಲುಗಳು ಅನುಕರಣೀಯವಾಗಿವೆ.
ಸಲೆ ಕಷ್ಟಕೋಟಿ ಬರಲಿ ನಮಗಾದರಾತ್ಮ ಧಾತ |
ತಲೆ ಮಾತ್ರ ಬಾಗದಿರಲಿ ಅನ್ಯಾಯದೆದುರು ಧಾತಾ ||
     ಗಾಂಧಿಯವರು ಹೇಳಿದಂತೆ ಅಸತ್ಯ, ಅನ್ಯಾಯ, ದಬ್ಬಾಳಿಕೆಗಳನ್ನು ಸಹಿಸಿಕೊಳ್ಳುವುದು ಹೇಡಿತನವಾಗುತ್ತದೆ. ಹೋರಾಡಲು ನಮಗೆ ಶಕ್ತಿ ಇರದಿರಬಹುದು, ಮನಸ್ಸಿರದಿರಬಹುದು, ಆದರೆ ಹೋರಾಡುವವರನ್ನು ಹುರಿದುಂಬಿಸುವ, ಪ್ರೋತ್ಸಾಹಿಸುವ ಕನಿಷ್ಠ ಕೆಲಸವನ್ನಾದರೂ ನಾವು ಮಾಡಬಹುದು. ಸುಂಕದವನ ಮುಂದೆ ಸುಖ-ದುಃಖ ಹೇಳಿಕೊಳ್ಳಲಾಗದು, ಕಟುಕನ ಮುಂದೆ ಅಹಿಂಸೆಯ ಪಾಠ ಬೋಧಿಸಲಾಗದು. ಯಾರಿಗೆ ಯಾವ ರೀತಿಯಲ್ಲಿ ಉತ್ತರಿಸಬೇಕೋ ಆ ರೀತಿ ಉತ್ತರಿಸಬೇಕಾಗುತ್ತದೆ. ಯುವಶಕ್ತಿ ನಮ್ಮ ದೇಶದ ಶಕ್ತಿ. ಅವರುಗಳು ಅನ್ಯಾಯದ ವಿರುದ್ಧ ಧ್ವನಿ ಎತ್ತಿದರೆ ತಡೆಯುವವರು ಯಾರು?

ಮಾತನ್ನು ಹೇಗೆ ಆಡಬೇಕು?

ಸಕ್ತುಮಿವ ತಿತ ಉನಾ ಪುನಂತೋ ಯತ್ರ ಧೀರಾ ಮನಸಾ ವಾಚಮಕ್ರತಾ|

ಅತ್ರ ಸಖಾಯಃ ಸಖ್ಯಾನಿ ಜಾನತೇ ಭದ್ರೈಷಾಂ ಲಕ್ಷ್ಮೀರ್ನಿಹಿತಾಧಿ ವಾಚಿ|| (ಋಗ್ವೇದ.೧೦.೭೧.೨.)

ಹಿಟ್ಟನ್ನು ಜರಡಿಯಾಡುವಂತೆ ಪವಿತ್ರಗೊಳಿಸಲ್ಪಟ್ಟ ಮಾತನ್ನು ಮನಃಪೂರ್ವಕವಾಗಿ ಎಲ್ಲಿ ಧೀರರು ಉಂಟುಮಾಡುತ್ತಾರೋ ಅಲ್ಲಿ ಸ್ನೇಹವು ಸ್ನೇಹವನ್ನು ಅರಿಯುತ್ತದೆ ಮತ್ತು ಅಂತಹ ಮಾತುಗಳಲ್ಲಿಯೇ ಮಂಗಳಕರವಾದ ಸಂಪತ್ತು ಸ್ಥಿರವಾಗಿ ನೆಲೆಗೊಂಡಿರುತ್ತದೆ.

ನಮಗೆ ಮಾತನಾಡುವುದಕ್ಕೆ ಬರುತ್ತದೆ ಎಂದು ಹೇಗಾದರೂ ಮಾತನಾಡಲಾದೀತೇ? ಮಾತನ್ನು ಹೇಗೆ ಆಡಬೇಕು? ವೇದಮಂತ್ರವು ಹೇಳುತ್ತದೆ ” ನಿನ್ನ ಮೆದುಳಿನಲ್ಲಿ ಇಂತಾ ಮಾತನಾಡಬೆಕೆಂದು ನಿರ್ದೇಶನ ಸಿಕ್ಕಿ ಬಾಯಿ ಮೂಲಕ ಮಾತು ಹೊರಬರುವ ಮುಂಚೆ  ಹಿಟ್ಟನ್ನು ಜರಡಿಯಾಡುವಂತೆ  ಅದನ್ನು ಜರಡಿ ಯಾಡಿರಬೇಕು,  ನಾನಾಡುತ್ತಿರುವ ಮಾತು ಬೇರೆಯವರ ಮೇಲೆ ಏನು ಪರಿಣಾಮ ಉಂಟುಮಾಡುತ್ತದೆ, ಅದು ಇನ್ನೊಬ್ಬರಿಗೆ ನೋವುಂಟುಮಾಡುತ್ತದೆಯೇ? ಸತ್ಯವಾಗಿದೆಯೇ? ಕೇಳುವವರಿಗೂ ಹೇಳುವ ನನಗೂ ಹಿತಮಾಗಿದೆಯೇ? ಇಬ್ಬರಿಗೂ ಪ್ರಿಯ ವಾಗಿದೆಯೇ? …ಹೀಗೆ ಎಲ್ಲಾ ರೀತಿಯಲ್ಲೂ ಜರಡಿಯಾಡಿ ಮಾತು ಹೊರಬೀಳಬೇಕು.

ಜರಡಿಯ ಮೂರು ಪದರಗಳಂತೆ  ಸತ್ಯ, ಹಿತ, ಪ್ರಿಯ ಈ ಮೂರೂ ಗುಣಗಳಿರುವಹಾಗೆ ಜರಡಿಯಾಡಿ ಆನಂತರ ಮಾತು ಹೊರಬೀಳ ಬೇಕು. ಹೊರ ಬಿದ್ದ ಮಾತು ಎಷ್ಟಿರಬೇಕು?      ಮಿತವಾಗಿರಬೇಕು. ವ್ಯರ್ಥ ಮಾತನ್ನು ಆಡಬಾರದು.ಹೀಗಿದ್ದಾಗ ನಮ್ಮ ಸ್ನೇಹ ಗಟ್ಟಿ ಯಾಗಿ ಉಳಿಯುತ್ತದೆ. ಇದರಿಂದ ಧೀರನಾದವನು  ವ್ಯರ್ಥವಾದ ಮಾತನ್ನು ಆಡಲಾರ. ಅವನ ಮಾತು ಮಧುರವಾಗಿ, ಸತ್ಯವಾಗಿ, ಹಿತವಾಗಿ ಮಿತವಾಗಿ ಎಲ್ಲರಿಗೂ ಆಪ್ಯಾಯಮಾನವಾಗಿರುತ್ತದೆ. 

ವೇದಾಸಕ್ತರಿಗೆ ಅಪೂರ್ವ ಅವಕಾಶ

  ಹಾಸನದಲ್ಲಿ 16.8.2014 ಮತ್ತು 17.8.2014ರಂದು ಎರಡು ದಿನಗಳು ವೇದಭಾರತಿಯ ವಾರ್ಷಿಕೋತ್ಸವದ ನಿಮಿತ್ತ ವಿಶೇಷ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲಾಗಿದೆ. ವೇದಾಸಕ್ತರಿಗೆ ಎರಡು ದಿನಗಳ ಕಾರ್ಯಾಗಾರವಲ್ಲದೆ, ಸಾರ್ವಜನಿಕರಿಗೂ ವಿಶೇಷ ಮನರಂಜನಾ ಮತ್ತು ಸಾಮಯಿಕ ಮಹತ್ವದ ವಿಚಾರದ ಕುರಿತು ಉಪನ್ಯಾಸ ಏರ್ಪಡಿಸಲಾಗಿದೆ. ಎಲ್ಲರಿಗೂ ಆದರದ, ಆತ್ಮೀಯ ಸ್ವಾಗತವಿದೆ. ದಿ. 20.8.2014ರಿಂದ 24.8.2014ರವರೆಗೆ ಗೀತಾಜ್ಞಾನ ಯಜ್ಞವಿರುತ್ತದೆ.

ಸಾರ್ವಜನಿಕರಿಗಾಗಿ:

ಸ್ಥಳ: ಕನ್ನಡ ಸಾಹಿತ್ಯ ಪರಿಷತ್ ಭವನ, ಹಾಸನ

16.8.2014: ಬೆ. 9.00ಕ್ಕೆ: 

ಉದ್ಘಾಟನೆ: ಶ್ರೀ ಶ್ರೀ ಶ್ರೀ ಶಂಭುನಾಥ ಸ್ವಾಮೀಜಿ, ಆದಿಚುಚಂಚನಗಿರಿ ಮಠ, ಹಾಸನ ಶಾಖೆ.

ಮುಖ್ಯ ಅತಿಥಿಗಳು: ಶ್ರೀ ಸು. ರಾಮಣ್ಣ, ಹಿರಿಯ ಪ್ರಚಾರಕರು, ರಾ.ಸ್ವ.ಸಂ., ಅಖಿಲ ಭಾರತ ಪ್ರಮುಖರು, ಕುಟುಂಬ ಪ್ರಬೋಧನ್

                          ಶ್ರೀ ಸುಧಾಕರ ಶರ್ಮ, ವೇದಚಿಂತಕರು

                          ಶ್ರೀ ಶಂಕರಪ್ಪ, ರಾಜ್ಯಾಧ್ಯಕ್ಷರು, ಮಾದಿಗ ದಂಡೋರ ಸಮಿತಿ

                          ಶ್ರೀ ಸಿ.ಎಸ್. ಕೃಷ್ಣಸ್ವಾಮಿ, ಪ್ರಾಂಶುಪಾಲರು, ರಾ.ಕೃ.ವಿದ್ಯಾಲಯ

16.8.2014: ಸಾ. 5.30ಕ್ಕೆ:

ಭರತ ನಾಟ್ಯ - ಕು. ಅಕ್ಷತಾರಾಮಕೃಷ್ಣರಿಂದ

ಉಪನ್ಯಾಸ: ಜಗದ್ಗುರು ಭಾರತ - 1 - ಶ್ರೀ ಸು. ರಾಮಣ್ಣರವರಿಂದ.

17.8.2014: ಸಾ. 5.00ಕ್ಕೆ:

ವೀಣಾವಾದನ: ಕು. ಸಹನಾ ಆರ್.ಪಿ.ರವರಿಂದ

ಉಪನ್ಯಾಸ: ಜಗದ್ಗುರು ಭಾರತ - 2 - ಶ್ರೀ ಸು. ರಾಮಣ್ಣರವರಿಂದ.

20.8.2014ರಿಂದ 24.8.2014ರವರೆಗೆ: ಸಾ. 6.00ರಿಂದ 7.30ರವರೆಗೆ:

ಸ್ಥಳ: ಶ್ರೀ ಆದಿಚುಂಚನಗಿರಿ ಮಠ, ಹಾಸನದ ಯಾಗಮಂಟಪದಲ್ಲಿ.

ಗೀತಾಜ್ಞಾನಯಜ್ಞ -  ಭಗವದ್ಗೀತಾ ಸಾರವನ್ನು ಉಣಬಡಿಸಲಿದ್ದಾರೆ:

ಪೂಜ್ಯ ಶ್ರೀ ಶ್ರೀ ಚಿದ್ರೂಪಾನಂದ ಸರಸ್ವತೀ, ಆರ್ಷ ವಿದ್ಯಾಪೀಠ, ಹುಬ್ಬಳ್ಳಿ

-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-

ವೇದಾಸಕ್ತರಿಗೆ ಮತ್ತು ಕಾರ್ಯಾಗಾರದಲ್ಲಿ ಭಾಗವಹಿಸುವವರಿಗಾಗಿ:

ಪ್ರತಿದಿನ ಬೆ. 9.00 ರಿಂದ ಸಾಯಂಕಾಲದವರೆಗೆ:

ವಿಷಯಗಳು:

16.8.2014:

1. ಸಾಮಾಜಿಕ ಸಾಮರಸ್ಯಕ್ಕಾಗಿ ವೇದ -  ಮಾರ್ಗದರ್ಶನ: ಶ್ರೀ ಶ್ರುತಿಪ್ರಿಯ, ಸಂಪಾದಕರು, ವೇದತರಂಗ, ಬೆಂಗಳೂರು. 

2. ಸಮಾಜ ಮತ್ತು ನಾನು: - ಮಾರ್ಗದರ್ಶನ: ಶ್ರೀ ಸು. ರಾಮಣ್ಣ

3. ಮಹಿಳೆ ಮತ್ತು ವೇದ: - ಮಾರ್ಗದರ್ಶನ: ಶ್ರೀಮತಿ ಅಮೃತವರ್ಷಿಣಿ ಉಮೇಶ್.

4. ಸತ್ಸಂಗ: - ಮಾರ್ಗದರ್ಶನ: ಶ್ರೀ ವಿಶ್ವನಾಥ ಶರ್ಮ

17.8.2014

5. ನಮ್ಮ ಮನೆ: - ಮಾರ್ಗದರ್ಶನ: ಶ್ರೀ ಸು. ರಾಮಣ್ಣ

6. ರಕ್ಷಾ ಬಂಧನ ಮತ್ತು ಮುಂದಿನ ಕಾರ್ಯಗಳ ಯೋಜನೆ

7. ಸಂಪ್ರದಾಯಗಳು: - ಮಾರ್ಗದರ್ಶನ: ಶ್ರೀ ಸುಧಾಕರ ಶರ್ಮ

8. ಗಣ್ಯರೊಡನೆ ಸಂವಾದ.

ಆಹ್ವಾನ ಪತ್ರಿಕೆ ಮತ್ತು ಕಾರ್ಯಾಗಾರದ ವಿವರ ಹೀಗಿದೆ:

ಏಕಲ್ ವಿದ್ಯಾಲಯ ಮತ್ತು ವೇದಭಾರತಿಯ ಸಂಯುಕ್ತ ಸಭೆ

ವೇದಮಂತ್ರವನ್ನು ಕಲಿಸುವುದಷ್ಟೇ ವೇದಭಾರತಿಯ ಉದ್ಧೇಶವಲ್ಲ, ಸಾಮಾಜಿಕ ಚಟುವಟಿಕೆಗಳಲ್ಲಿ ಸಕ್ರಿಯವಾಗಿ ಜೋಡಿಸಿಕೊಂಡು ಅಲ್ಲೂ  ವೇದದ ಅರಿವು ಮೂಡಿಸಲು ವೇದ ಭಾರತಿಯು ನಡೆಸಿದ ಚಿಂತನ ಘೋಷ್ಠಿ.

ಅಗ್ನಿಹೋತ್ರದಿಂದ ಆರಂಭ

ಶ್ರೀ ರಾಕೇಶ್,ಡಾ.ವೀರಭದ್ರಪ್ಪ, ಶ್ರೀ ಕವಿನಾಗರಾಜ್ ಮತ್ತು ಮಾತನಾಡುತ್ತಿರುವವರು ಶ್ರೀ ಕೆ.ಪಿ.ಎಸ್.ಪ್ರಮೋದ್

ಏಕಲ್ ಕಾರ್ಯದರ್ಶಿ ಶ್ರೀ ನಂದಕುಮಾರ್

ನನ್ನನ್ನು ಸಭೆಯಲ್ಲಿ ಹುಡುಕ ಬೇಡಿ, ನಾನು ಚಿತ್ರೀಕರಣ ನಡೆಸುತ್ತಿದ್ದೆ.
 -ಹರಿಹರಪುರಶ್ರೀಧರ್

ಹಾಸನದ ವೇದಭಾರತಿ ಸತ್ಸಂಗದಲ್ಲಿ -ಭಜನ್

ಹಾಸನದ ವೇದಭಾರತಿಯ ಆಶ್ರಯದಲ್ಲಿ ನಿತ್ಯವೂ ಸಂಜೆ 6.00 ರಿಂದ 7.00 ರ ವರಗೆ ನಡೆಯುವ ಸತ್ಸಂಗದಲ್ಲಿ ಈ ಭಜನೆಯನ್ನೂ ಕೂಡ ಹಾಡುವೆವು.
 


ಭಜನ್ -೧

ಜ್ಯೋತೀಸ್ವರೂಪ ಭಗವನ್ | ಆ ದಿವ್ಯ ಜ್ಯೋತಿ ನೀಡು |

ಈ ತಿಮಿರ ರಾಶಿ ಹರಿದು | ಮನವಾಗೆ ಬೆಳಕ ಬೀಡು || ೧||

ಪ್ರಾಸಾದ ಕುಟಿಗಳಲ್ಲಿ | ಧನಿ ದೀನರಲ್ಲಿ ದೇವ |      

ವೈಶಮ್ಯ ದ್ವಂದ್ವದಲ್ಲಿ ನೀಡೆಮಗೆ ಸಾಮ್ಯ ಭಾವ || ೨||

ನರರೆಲ್ಲ ಸರಿಸಮಾನ | ಎಂಬೀ ಪ್ರಬುದ್ಧ ಭಾವ |    

ಉರದಲ್ಲಿ ಮೂಡುವಂತೆ| ಧೃತಿ ನೀಡು ಸತ್ಪ್ರಭಾವ || ೩||

ದೀನರ್ಗೆ ನೋವನಿತ್ತು | ಸಂಪತ್ತ ಗಳಿಸದಂತೆ |          

ನೀ ನೀಡು ಶುದ್ಧಮತಿಯಾ | ಪರಹಿಂಸೆಗೆಳೆಸದಂತೆ|| ೪||

ಮನದಲ್ಲಿ ಮಾತಿನಲ್ಲಿ | ಮೈಯಲ್ಲಿ ಸತ್ಯಮಾತ್ರ |       

ಮೊನೆವಂತೆ ಆತ್ಮಬಲವ | ನೀಡೈ ಜಗದ್ವಿಧಾತ್ರ || ೫||

ಸಲೆ ಕಷ್ಟಕೋಟಿ ಬರಲಿ |ನಮಗಾದರಾತ್ಮಧಾತಾ |         

ತಲೆ ಮಾತ್ರ ಬಾಗದಿರಲಿ | ಅನ್ಯಾಯದೆದುರು ಧಾತಾ || ೬||

ಪಾಪಾಚರಣ ವಿರಕ್ತಿ | ಜೀವಾತ್ಮರಲನುರಕ್ತಿ|          

ತಾಪಾಪಹಾರ ಶಕ್ತಿ | ನೀಡೆಮಗೆ ನಿನ್ನ ಭಕ್ತಿ || ೭||

ಬಾಧಾ ಕಠೋರ ಕ್ಲೇಶ | ಪ್ರತಿನಿತ್ಯ ಸಹಿಪೆವಾವು |         

ವೇದೋಕ್ತ ಧರ್ಮ ಮಾತ್ರ | ಬಿಡೆವಡಸಿದೊಡೆಯೆ ಸಾವು|| ೮||     

ಭಾವಾರ್ಥ

                ಹೇ ಜ್ಯೋತಿ ಸ್ವರೂಪನಾದ ಪರಮಾತ್ಮನೇ, ನೀನು ಸ್ವಯಂ ಪ್ರಕಾಶ, ಸ್ವಯಂ ಜ್ಯೋತಿ.  ನೀನು ನನಗೆ ಆ ನಿನ್ನ ದಿವ್ಯ ಪ್ರಕಾಶಮಯವಾದ ಜ್ಯೋತಿ ಸ್ವರೂಪವನ್ನು ಅನುಗ್ರಹಿಸು. ನನ್ನ ಮನದಲ್ಲಿ ಆ ನಿನ್ನ ಚೈತನ್ಯಸ್ವರೂಪವು ಕಾಣುವಂತಾಗಲಿ. ನನ್ನಲ್ಲಿರುವ ಅಜ್ಞಾನವೆಂಬ ಕತ್ತಲು ನಿವಾರಣೆಯಾಗಿ ನಿನ್ನ ಪರಂಜ್ಯೋತಿ ಸ್ವರೂಪ ಜ್ಞಾನವೆಂಬ ಬೆಳಕು ನನ್ನ ಮನದಲ್ಲಿ ಮೂಡುವಂತೆ ಅನುಗ್ರಹಿಸು.

                ಓ ದೇವನೇ, ಸರ್ವಾಂತರ್ಯಾಮಿಯಾದ ಪರಮಾತ್ಮನೇ,  ಭವ್ಯ ಭವದಲ್ಲಾಗಲಿ, ಕುಟೀರದಲ್ಲಾಗಲಿ, ಧನಿಕರಲ್ಲಾಗಲಿ, ದೀನರಲ್ಲಾಗಲಿ, ಎಲ್ಲೆಲ್ಲಿಯೂ, ಎಲ್ಲರಲ್ಲಿಯೂ, ವಿಷಮತೆಯ, ಭೇದಭಾವದ ದ್ವಂದ್ವದಲ್ಲಿಯೂ ಈ ಬಡವ, ಬಲಿದ, ಉಚ್ಛ, ನೀಚ, ಪಂಡಿತ, ಪಾಮರರೆಂಬ ವಿಷಮಭಾವವನ್ನು, ಭೇದಭಾವವನ್ನು ತೊಡೆದು ಈ ಮಾನವರೆಲ್ಲರೂ ಒಂದಾಗಿ ಬಾಳಲನುವಾಗುವ ಸಮತಾಭಾವನೆಯನ್ನು ಮಾನವರಾದ ನಮಗೆ ನೀಡು.

(ಬ್ರಹ್ಮಜ್ಞಾನ ದೊರೆತಾಗ ಶ್ರೀಮಂತ ಬಡವ ಎಂಬ ವ್ಯತ್ಯಾಸವಾಗಲಿ ಗುಡಿಸಲು ಭವನ ಎಂಬ ಅಂತರವಾಗಲಿ ಮೂಡುವುದಿಲ್ಲ. ಪರಬ್ರಹ್ಮನ ದೃಷ್ಟಿಯುಳ್ಳವನಿಗೆ ದೇಶ-ಕಾಲ, ಕೃತ-ಅಕೃತ, ದ್ವೈತ-ಅದ್ವೈತ, ಪುಣ್ಯ-ಪಾಪ, ಧರ್ಮ-ಅಧರ್ಮ, ಜನನ-ಮರಣ, ರಾಗ-ದ್ವೇಷ, ಬಂಧ-ಮೋಕ್ಷ, ಮುಂತಾದವುಗಳ್ಳಲ್ಲಿ, ದ್ವಂದ್ವ ಭಾವವಿರುವುದಿಲ್ಲ; ಅಂತಹ ಸಾಮ್ಯತಾ ಮನೋಭಾವವನ್ನು ನಮಗೆ ನೀಡು.)

       

                ಹೇ ದೇವನೇ ಎಲ್ಲಾ ಮಾನವರು ಸರಿಸಮಾನರು,  ಎಂಬ ಪ್ರಬುದ್ಧ ಭಾವವು ನಮ್ಮ  ಹೃದಯದಲ್ಲಿ ಸದಾ ಮೂಡುವಂತೆ ಧೈರ್ಯವನ್ನು ವಿವೇಕವನ್ನು, ಸತ್-ಶಕ್ತಿಯಾದ ಭಗವಂತನೇ ನೀನು ನಮಗೆ ದಯಪಾಲಿಸು.

                ಬಡವರಿಗೆ ನೋವನಿತ್ತು, ಪರರನ್ನು ಹಿಂಸಿಸಿ ಐಶ್ವರ್ಯ ಗಳಿಸದಂತಹ ಶುದ್ಧಬುದ್ಧಿಯನ್ನು ನಮಗೆ ದಯಪಾಲಿಸು.

                ಹೇ ಜಗತ್-ಸೃಷಿಕರ್ತನಾದ ಪರಮಾತ್ಮನೇ ನನ್ನ ಮನಸ್ಸಿಸಲ್ಲಿ, ಮಾತಿನಲ್ಲಿ, ಮತ್ತು ನನ್ನ ಕೃತಿಯಲ್ಲಿ ಸತ್ಯ ದೃಷ್ಟಿ, ಸತ್ಯ ಸಂಕಲ್ಪ ಮಾತ್ರ ಹುಟ್ಟುವಂತೆ ಶಕ್ತಿಯನ್ನು ನೀಡು. ಹೀಗೆ ನನ್ನ ಮನಸ್ಸಿನಲ್ಲಿರುವ ಸತ್ಯವೇ ಮಾತಾಗಿ, ಮಾತೇ ಕೃತಿಯಾಗಿ, ಹೊರಹೊಮ್ಮಲಿ.

                ನಮಗಾದರಾತ್ಮನಾದ ಒಡೆಯನೇ ಎಷ್ಟೇ ದೊಡ್ಡ ಕಷ್ಟಕೋಟಲೆಗಳು ಬಂದರೂ, ಅನ್ಯಾಯದೆದುರು ತಲೆಬಾಗುವ ಸ್ಥಿತಿ ಬರದಿರಲಿ, ಆ ಶಕ್ತಿಯನ್ನು ದಯಪಾಲಿಸು.

         ಹೇ ಪ್ರಭುವೇ ಪಾಪಚರಣೆಯಿಂದ ವಿರಕ್ತಿಯನ್ನು(ಬಿಡುಗಡೆಯನ್ನು), ಸಕಲ ಜೀವಾತ್ಮರಲ್ಲಿ ಅನುರಾಗವನ್ನು, ಪ್ರೀತಿಯನ್ನು, ತಾಪತ್ರಯಗಳನ್ನು ದೂರಮಾಡುವ ಶಕ್ತಿಯನ್ನು, ನಿನ್ನಲ್ಲಿ ಅಮಿತವಾದ ಭಕ್ತಿಯನ್ನು ನಮಗೆ ನೀಡು.

ನಮಗೆ ಒದಗಬಹುದದ ತಾಪತ್ರಯಗಳೂ ಮೂರು ವಿಧ :

 ೧) ಆಧ್ಯಾತ್ಮಿಕ : ಚಿಂತೆ, ಭಯ ಮೊದಲಾದುವುಗಳಿಂದ ಉಂಟಾಗುವ ತೊಂದರೆ.

 ೨) ಆಧಿಭೌತಿಕ : ದುರ್ಬಲನಾದವನಿಗೆ ಪ್ರಬಲನಿಂದ ಉಂಟಾಗುವ ತೊಂದರೆ.

 ೩) ಆಧಿದೈವಿಕ :ಚಂಡಮರುತ, ಭೂಕಂಪ, ಜ್ವಾಲಾಮುಖಿ, ಹಿಮಪಾತ, ಅತಿವೃಷ್ಟಿ, ಅನಾವೃಷ್ಟಿ, ಸಿಡಿಲು, ಜಲಪ್ರವಾಹ ಮುಂತಾದುವುಗಳಿಂದ ಉಂಟಾಗುವ ತೊಂದರೆ. 

                ಓ ಪರಂಜ್ಯೋತಿ ಸ್ವರೂಪನೇ ನಮ್ಮ ದೇಹಕ್ಕೆ ಮತ್ತು ಮನಸ್ಸಿಗೆ ಪ್ರತಿನಿತ್ಯ ಎಷ್ಟೇ ಕಠೋರವಾದ ನೋವು-ಕಷ್ಟ-ಕ್ಲೇಶಗಳೂ ಬಂದರೂ ನಾವು ಸಹಿಸಬಲ್ಲೆವು, ಆದರೆ ವೇದೋಕ್ತ ಧರ್ಮ ಮಾರ್ಗವನ್ನು ಬಿಡಲಾರೆವು. ವೇದೋಕ್ತ ಧರ್ಮಕ್ಕೆ ಮಾತ್ರ ಏನಾದರೂ ಚ್ಯುತಿ, ತಡೆ ಬಂದರೆ ಪ್ರಾಣತ್ಯಾಗವಾದರೂ ಚಿಂತೆಯಿಲ್ಲ, ವೇದೋಕ್ತ ಧರ್ಮವನ್ನು ಕಾಪಾಡುವೆವು ಅಂತಹ ಶಕ್ತಿಯನ್ನು ನೀನು ನಮಗೆ ದಯಪಾಲಿಸು.

----------------------------------------------------------------

ಭಜನ್ -೨

ಓಂ ಜಯ್ ಜಗದೀಶ ಪಿತಾ, ಪ್ರಭು ಜಯ್ ಜಗದೀಶ ಪಿತಾ |

ವಿಶ್ವ ವಿರಂಚ ವಿಧಾತಾ, ಜಗತ್ರಾತಾ ಸವಿತಾ || ಓಂ||

ಅನಂತ,ಅನಾದಿ,ಅಜನ್ಯಾ, ಅವಿಚಲ ಅವಿನಾಶೀ|

ಸತ್ಯ ಸನಾತನ ಸ್ವಾಮೀ, ಶಂಕರ ಸುಖರಾಶೀ || ಓಂ||

ಸೇವಕಜನ ಸುಖದಾಯಕ, ಜನನಾಯಕ ತುಮ ಹೋ |

ಶುಭ ಸುಖ ಶಾಂತಿ ಸುಮಂಗಲ, ವರದಾಯಕ ತುಮ ಹೋ ||ಓಂ||

ಮೈ ಸೇವಕ ಶರಣಾಗತ, ತುಮ ಮೇರೆ ಸ್ವಾಮೀ |

ಹೃದಯಪಟಲ ಮೇ ಪ್ರಕಟೋ, ಪ್ರಭು ಅಂತರ್ಯಾಮೀ ||ಓಂ||

ಕಾಮಕ್ರೋಧಮದಮೋಹ ಕಪಟಛಲ್, ವ್ಯಾಪೇ ನಹೀ ಮನ ಮೇ |

ಲಗನ ಲಗೇ ಮಮ ಮನಕೀ, ಗುಣ ತೇರೇ ವರ್ಣನ ಮೇ ||ಓಂ|| 

ನಿತ್ಯ ನಿರಂಜನ ನಿಶಿದಿನ, ತೇರೋ ಹೀ ಜಾಪ ಕರೇ |

ತವ ಪ್ರತಾಪ ಸೇ ಸ್ವಾಮೀ ತೀನೋ ಹಿ ತಾಪ ಹರೇ ||ಓಂ||

ಪತಿತ ಉದ್ಧಾರಣ ತಾರಣ  ಶರಣಾಗತ ತೇರೀ |

ಭೂಲೇ ನ ಭಟಕೇ ಭ್ರಮಮೇ  ನಿರ್ಮಲ ಮತಿ ಮೇರೀ ||ಓಂ||

ಶುದ್ಧ ಬುದ್ಧಿ ಸೇ ಮನ ಮೇ ತೇರೋ ಹೀ ವರಣ ಕರೇ |

ಸಬ್ ವಿಧ್ ಛಲಬಲ ತಜ ಕೇ ತೇರೋ ಹೀ ಶರಣ ಪಡೇ ||ಓಂ|| 

ಭಾವಾರ್ಥ: 

ಜಗತ್ತಿಗೆ ಒಡೆಯನಾದ ತಂದೆಯೇ, ಸಮಸ್ತ ಜಗತ್ತಿನ ಪ್ರಭುವೇ, ವಿಶ್ವವನ್ನೇ ನಿರ್ಮಿಸಿದ ಬ್ರಹ್ಮನೇ, ಜಗತ್ತನ್ನು ರಕ್ಷಿಸುವ ಸೂರ್ಯನೇ ನಿನಗೆ ಜಯವಾಗಲಿ.

ಭಕ್ತನಿಂದ ಪರಮಾತ್ಮನ ಸ್ತುತಿ:

        ಪ್ರಭುವೇ ನೀನು ಆದಿ ಅಂತ್ಯಗಳಿಲ್ಲದವನೂ, ಹುಟ್ಟು ಸಾವುಗಳಿಲ್ಲದವನೂ, ಅವಿಚಲನಾಗಿರುವ ಕಾರಣ ಸರ್ವವ್ಯಾಪಿಯೂ ಅಗಿದ್ದೀ, ಒಡೆಯನೇ, ನೀನು ಸತ್ಯ ಸ್ವರೂಪಿಯೂ, ಅನಾದಿ ಕಾಲದಿಂದಲೂ ಇರುವವನೂ, ಇನ್ನು ಎಂದೆಂದಿಗೂ ಇರುವವನೂ, ಮಂಗಳಕರನೂ, ಸುಖ ಸಂತೋಷಗಳ ನಿಧಿಯೂ ನೀನಾಗಿದ್ದಿ.

        ನಿನ್ನನ್ನು ಸದಾ ಸೇವಿಸುವ (ಪೂಜಿಸುವ, ಆರಾಧಿಸುವ, ಉಪಾಸಿಸುವ)ವರಿಗೆ ಸುಖವನ್ನು ನೀಡುವವನು, ಸಮಸ್ತ ಜೀವರಾಶಿಗಳಿಗೆ ಒಡೆಯನೂ ನೀನಾಗಿದ್ದಿ, ಮಂಗಳ ಸ್ವರೂಪನೂ, ಸುಖಸ್ವರೂಪನೂ, ಶಾಂತಿ ಸ್ವರೂಪನೂ, ಬೇಕಾದ ವರಗಳನ್ನು ನೀಡುವ ವರದಾಯಕನೂ ನೀನಾಗಿದ್ದಿಯೆ.

ಭಕ್ತನ ವಿನಂತಿ:

        ಓ ನನ್ನ ಸ್ವಾಮಿಯೇ, ಒಡೆಯನೇ, ನಾನು ನಿನ್ನ ಸೇವಕನು, ನಿನ್ನನ್ನು ಶರಣುಹೊಂದಿದವನು, ನೀನಾದರೋ ಎಲ್ಲೆಲ್ಲೂ ಇರುವ ಅಂತರ್ಯಾಮಿ, ದಯಮಾಡಿ ನನ್ನ ಹೃದಯದಲ್ಲಿ ಪ್ರಕಟಗೊಂಡು ನಿನ್ನ ಸ್ವರೂಪವನ್ನು ನನಗೆ ಅನುಗ್ರಹಿಸು.

ಭಕ್ತನ ಗುಣಗಳು

        ಕಾಮ-ಕ್ರೋಧ-ಮದ-ಮೋಹ-ಕಪಟ-ಹಠ  ಮೊದಲಾದ ದುರ್ಗುಣಗಳು ನನ್ನ ಮನಸ್ಸನ್ನು ಆವರಿಸಿಲ್ಲ, ಇವುಗಳಿಗೆ ನನ್ನ ಮನದಲ್ಲಿ ಜಾಗವು ಇಲ್ಲವೇ ಇಲ್ಲ. ಇವುಗಳ ಬದಲು ನಿನ್ನ ಗುಣಗಳ ವರ್ಣನೆಯನ್ನು ಮಾಡಲು ನಿನ್ನನ್ನು ಸ್ತುತಿಸಲು, ನನ್ನ ಮನಸ್ಸಿನಲ್ಲಿ ಬಯಕೆಯುಂಟಾಗುತ್ತಿದೆ.

ಭಕ್ತನ ಕೋರಿಕೆ

        ಓಡೆಯನೇ, ನಿತ್ಯನೂ, ನಿರಂಜನನೂ, ಆದ ನಿನ್ನನ್ನು ನಾವು ಹಗಲಿರುಳು ಜಪಿಸುತ್ತೇವೆ. ನಿನ್ನ ಶಕ್ತಿಯಿಂದ ನನ್ನ ತಾಪತ್ರಯಗಳನ್ನು ದೂರಮಾಡು.

ಭಕ್ತನ ಆಸೆ   

        ಭಗವಂತನೇ, ನೀನಾದರೂ ಕಷ್ಟದಲ್ಲಿರುವವರನ್ನು ಉದ್ಧರಿಸುವವನೂ, ಶರಣಾದವರನ್ನು ರಕ್ಷಿಸಿ ಕಾಪಾಡುವವನೂಆಗಿದ್ದೀಯೆ.  ನಿನ್ನನ್ನು ನಾವು ದಾರಿತಪ್ಪಿ ಭ್ರಮೆಯಿಂದ ಮರೆಯಲಾರೆವು, ನಮ್ಮದು ನಿನ್ನನ್ನೇ ಅನುದಿನವೂ ಧ್ಯಾನಿಸುವ ನಿರ್ಮಲ ಮನಸ್ಸಾಗಿದೆ.

ಭಕ್ತನ ಸಂಕಲ್ಪ      

        ಪ್ರಭುವೇ, ಶುದ್ಧವಾದ ಬುದ್ಧಿಯಿಂದ, ಮನಃಪೂರ್ವಕವಾಗಿ ನಮ್ಮ ಮನಸ್ಸಿನಲ್ಲಿ ನಿನ್ನ ವರ್ಣನೆಯನ್ನೇ ಮಾಡುತ್ತೇವೆ. ಎಲ್ಲಾ ವಿಧವಾದ ಹಠ-ಬಲವನ್ನು ಅಮೂಗ್ರವಾಗಿ ದೂರಗೊಳಿಸಿ ನಿನ್ನನ್ನೇ ಶರಣು ಹೊಂದುತ್ತೇವೆ.             

- ಬೈರಪ್ಪಾಜಿ, ವೇದಭಾರತೀ, ಹಾಸನ

ಲೋಭಕ್ಕೆ ಮದ್ದುಂಟೆ?

ಉಲೂಕಯಾತುಂ ಶುಶುಲೂಕಯಾತುಂ ಜಹಿ ಶ್ವಯಾತುಮುತಕೋಕಯಾತುಮ್ | 

ಸುಪರ್ಣಯಾತುಮುತ ಗೃಧ್ರಯಾತುಂ
ದೃಷದೇವ ಪ್ರ ಮೃಣ ರಕ್ಷ ಇಂದ್ರ || (ಋಕ್.೭.೧೦೪.೨೨)

ರಕ್ಷಸ್ ಎಂದರೆ ದುರ್ಭಾವನೆ. ಯಾರು ದುರ್ಭಾವನೆಗಳನ್ನು ಹೊಂದಿರುತ್ತಾರೋ ಅವರೇ ರಾಕ್ಷಸರು. ರಾಕ್ಷಸರು ಎಂದರೆ ಅವರು ಬೇರೆ ಯಾವುದೋ ಜೀವಿಗಳಲ್ಲ, ಮಾನವರೂಪಿಗಳಾಗೇ ಇದ್ದು ದುರ್ಭಾವನೆಗಳನ್ನು ಹೊಂದಿದವರು. ಈ ವೇದಮಂತ್ರದಲ್ಲಿ ಮಾನವನಲ್ಲಿ ಕಂಡು ಬರುವ ದುರ್ಭಾವನೆಗಳಾದ ಮೋಹವನ್ನು ಗೂಬೆಯ ನಡೆಗೂ, ಕ್ರೋಧವನ್ನು ತೋಳದ ಸ್ವಭಾವಕ್ಕೂ, ಮತ್ಸರವನ್ನು ನಾಯಿಯ ಗುಣಕ್ಕೂ, ಕೋಕ ಪಕ್ಷಿಯನ್ನು (ಚಕ್ರವಾಕ/ಜಕ್ಕವಕ್ಕಿ) ಕಾಮದ ಸಂಕೇತವಾಗಿಯೂ, ತಾನೇ ಮೇಲೆಂಬ ಗರ್ವ(ಮದ)ಕ್ಕೆ ಗರುಡ ಪಕ್ಷಿಯನ್ನೂ, ಹದ್ದನ್ನು ಲೋಭಕ್ಕೆ ಸಂಕೇತಿಸಿದ್ದು, ಈ ಗುಣಗಳನ್ನು ತೀಡಿ ಹಾಕು, ನಿರ್ಮೂಲ ಮಾಡು ಎಂದು ಜೀವಾತ್ಮರಿಗೆ ಕರೆ ಕೊಡಲಾಗಿದೆ. ಮಾನವನ ಶತ್ರುಗಳಾದ ಈ ಆರು ಗುಣಗಳು ಅವನನ್ನು ರಾಕ್ಷಸನನ್ನಾಗಿ ಮಾಡುವಲ್ಲಿ ಪ್ರಧಾನ ಪಾತ್ರ ವಹಿಸುತ್ತವೆ. ಕಾಮ, ಕ್ರೋಧ, ಮದ, ಮತ್ಸರ, ಮೋಹಗಳ ಕುರಿತು ಪ್ರತ್ಯೇಕ ಲೇಖನಗಳಲ್ಲಿ ಚರ್ಚಿಸಿದ್ದು, ಲೋಭದ ಕುರಿತು ಇಲ್ಲಿ ವಿಚಾರವನ್ನು ಹಂಚಿಕೊಳ್ಳೋಣ.

ಪೂರ್ಣ ಲೇಖನಕ್ಕೆ ಕೆಳಗೆ ಕ್ಲಿಕ್ಕಿಸಿ;

http://vedajeevana.blogspot.in/2014/07/blog-post_23.html
ಕ.ವೆಂ.ನಾಗರಾಜ್.